कञ्चनपुर /कञ्चनपुरमा विद्यार्थी संख्या लगातार घट्दै गएपछि जिल्लाभरका ११ सामुदायिक विद्यालय औपचारिक रूपमा समायोजन गरिएको छ। शिक्षा विकास तथा समन्वय एकाइका अनुसार करिब तीन दर्जन विद्यालयमा तह मिलानको प्रक्रिया पनि अगाडि बढाइएको छ।
शुक्लाफाँटा नगरपालिकामा मात्र चार आधारभूत विद्यालय नजिकैको माध्यमिक विद्यालयमा गाभिएका छन्। विद्यार्थी कम भएपछि विद्यालय व्यवस्थापन समितिको निर्णयअनुसार मिलन, सरस्वती, त्रिमूर्ति र शान्ति आधारभूत विद्यालय अन्य माध्यमिक विद्यालयमा समायोजन गरिएको शिक्षा शाखाले जनाएको छ। दुई विद्यालय भने कक्षा ५ बाट घटाएर कक्षा ३ सम्म सीमित गरिएका छन्।
कृष्णपुर नगरपालिकामा पनि चार विद्यालय समायोजन गरिएको छ। विद्यार्थी नभएपछि ती विद्यालयलाई आसपासका माध्यमिक विद्यालयमा गाभ्नुपरेको स्थानीय शिक्षा शाखाले जनाएको छ।
यस्तै वेदकोट नगरपालिकामा दुई आधारभूत विद्यालय, दोधारा–चाँदनीमा एक विद्यालय र लालझाँडी गाउँपालिकामा ५० भन्दा कम विद्यार्थी भएका विद्यालय समायोजन प्रक्रियामा छन्। पुनर्वास नगरपालिकाले कक्षा ७ र ८ सम्म सञ्चालन भएका विद्यालयलाई क्रमशः कक्षा ३ र ६ सम्म झार्ने तयारी गरिरहेको छ।
बेलडाँडी गाउँपालिकामा समेत कक्षा ८ सम्म सञ्चालनमा रहेका तीन विद्यालयलाई कक्षा ५ मा सीमित गरिएको छ भने कक्षा ५ सम्मका थप तीन विद्यालयलाई कक्षा ३ मा झारिएको छ।
भीमदत्त नगरपालिकामा झन्डै १८–२० सामुदायिक विद्यालय समायोजन तथा तह मिलानको तयारी भइरहेको छ। केही विद्यालयले सहमति नदिँदा प्रक्रिया सुस्त भएको बताइए पनि वार्ता जारी छ।
सामुदायिक विद्यालयमा भर्ना कम हुनु, संस्थागत विद्यालयतर्फ आकर्षण बढ्नु र प्रजनन दर घट्दै जानुले सार्वजनिक विद्यालय चापमुक्त हुँदै गएको शिक्षा अधिकारीहरूले उल्लेख गरेका छन्।
